बालखैमा दिल बस्यो गौथली–२’ सार्वजनिक, आयुषी–आलोकको मन छुने अभिनय

दीपक शर्मा र निश्चल अधिकारीको चर्चित सिर्जना ‘बालखैमा दिल बस्यो गौथली’ ले ६ करोडभन्दा बढी दर्शकको माया बटुलेसँगै यसको दोस्रो श्रृंखला ‘बालखैमा दिल बस्यो गौथली–२’ भिडियोसहित सार्वजनिक गरिएको छ।

यसपटक पनि बालगायक निश्चल अधिकारीकै स्वर, दीपक शर्माको शब्द तथा संगीत र नरेन्द्र वियोगीको एरेन्ज, मिक्सिङ र मास्टरिङले गीतलाई सान्दर्भिक बनाएको छ। भिडियोमा बालकलाकार आलोक चौरेली र आयुषा ढकालले प्रस्तुत गरेको लोभलाग्दो अभिनयले कथालाई झनै जीवन्त बनेको छ।

लोकप्रिय युवा निर्देशक प्रहील कार्कीले निर्देशन गरेको भिडियोमा उज्ज्वल भविष्यको खोजमा गाउँबाट शहर पसेको एक बालकले भोग्नुपरेको चुनौतीपूर्ण जीवन–यात्रा र त्यही उमेरकी एक साथीले दिएको सहारा मार्फत सिकाइ र भावनात्मक सम्बन्धलाई सशक्त रूपमा उतारिएको छ।

गीतका संगीतकार शर्माले यसलाई आफ्नो ‘आशालाग्दो पछिल्लो सृजना’ भनेका छन्। भिडियो निश्चल अधिकारीको अफिसियल युट्युब च्यानलबाट सार्वजनिक गरिएको हो।

भिडियो छायांकन राजेश घिमिरे र योगेन थापा, सम्पादन माधव वेल्वासेले गरेका छन्।
काठमाडौँका विविध स्थानमा खिचिएको दृश्यावलोकनले पनि भिडियोको आकर्षण बढाएको छ।